മരീചികയല്ലാതെ പ്രകമ്പനംകൊള്ളുന്ന ഒന്നും കാണാനില്ല മുന്നിലെങ്ങും. ചക്രവാളത്തിൽ തൊട്ടുരുമ്മിക്കിടക്കുന്ന തരിശായ മണൽക്കുന്നുകൾ മരീചികയുടെ ദീർഘശ്വാസത്തിൽ പ്രകമ്പനം കൊള്ളുകയാണ്. അസ്തമനസൂര്യന്റെ കടുത്ത രശ്മികളേറ്റ് വിളറിയ മഞ്ഞനിറത്തിലുള്ള മണൽക്കുന്നുകളുടെ അതിർവരമ്പുകൾ മങ്ങാൻ തുടങ്ങിയിരിക്കുന്നു. ഈ മണൽക്കാട്ടിൽ ആകെ തിരിച്ചറിയാനാകുന്ന വിശദാംശങ്ങൾ എന്നു പറയാവുന്നത് വളഞ്ഞുപുളഞ്ഞ് കിടക്കുന്ന മണൽക്കുന്നുകളുടെ മാഞ്ഞുപോകാറായ അതിർവരമ്പുകളും അവയ്ക്കിടയിൽ അവിടവിടെയായി കാണുന്ന ഉണങ്ങിയ മുൾച്ചെടികളുടെയോ വീണുകിടക്കുന്ന ശിലകളുടെയോ ഒക്കെ ശിഥിലമായ നിഴലുകളോ മാത്രമായിരിക്കും. വരണ്ടുണങ്ങിയ മരുഭൂമിയുടെ ഈ വിശാലമായ മണൽപ്പരപ്പിൽ മറ്റൊന്നുംതന്നെ കാണാനേയാകുന്നില്ല. മുകളിലേക്ക് നോക്കിയാലോ ആഗസ്റ്റ് മാസത്തിലെ കത്തിയാളുന്ന സൂര്യൻ മാത്രം!
ചക്രവാളത്തിലേക്ക് നോക്കിയാൽ ജീവന്റെ ആകെയുള്ള അടയാളമെന്ന് പറയാവുന്നത് ഇടയ്ക്കിടെ കേൾക്കുന്ന ഏതോ മൃഗത്തിന്റെ ഓരിയിടലും പിന്നെ അരികത്തായി ക്യാമ്പ് ചെയ്യുവാനുള്ള തയ്യാറെടുപ്പുകളിൽ ഏർപ്പെട്ടുകൊണ്ടിരിക്കുന്ന ഇസ്രയേൽ പട്ടാളക്കാരുടെ ഒച്ചപ്പാടും മാത്രമാണ്. ഒരു മണൽക്കുന്നിന്റെ മുകളിൽ കയറി ബൈനോക്കുലറിലൂടെ ചുറ്റുപാടും നിരീക്ഷിക്കുന്നതിനിടയിൽ ഈ ശബ്ദങ്ങൾ മാത്രമാണ് അയാളുടെ ചെവികളിൽ വന്നലച്ചുകൊണ്ടിരുന്നത്.അസഹനീയമായ വെയിലായിരുന്നിട്ടും മണൽക്കുന്നുകൾക്കിടയിലെ ഇടുങ്ങിയ വഴിത്താരകളും അവയുടെ വളവുതിരിവുകളും അയാൾ ശ്രദ്ധയോടെ നിരീക്ഷിച്ചു കൊണ്ടിരുന്നു. ഇടയ്ക്കിടയ്ക്ക് ഏതെങ്കിലുമൊരു മണൽക്കുന്നിലേക്ക് ഏറെനേരം സൂക്ഷിച്ചുനോക്കും. അവസാനം ബൈനോക്കുലർ തിരികെ ബോക്സിലേക്ക് വച്ചശേഷം നെറ്റിയിലെ വിയർപ്പ് തുടച്ചു. പിന്നീട് വൈകുന്നേരത്തെ കടുത്ത ചൂടിൽ അയാൾ ക്യാമ്പിലേക്ക് തിരിച്ചു നടന്നു.
നെഗേവ് മരുഭൂമിയുടെ ഈ ഭാഗത്ത് ഇസ്രയേൽ സൈനികരുടെ ഒരു വിഭാഗം എത്തിച്ചേർന്നപ്പോൾ ആകക്കൂടി കണ്ടത് നേരത്തേ ആരൊക്കെയോ താമസിച്ചിരുന്ന രണ്ട് കുടിലുകൾ മാത്രമായിരുന്നു. മൂന്നാമതൊരു കുടിലിന്റേതാകട്ടെ തകർന്നുവീഴാറായൊരു ചുമര് മാത്രമേ അവശേഷിച്ചിരുന്നുള്ളൂ. ഒന്നാം അറബ് ഇസ്രയേൽ യുദ്ധം ആരംഭിച്ചപ്പോഴുണ്ടായ അതിശക്തമായ ഷെല്ലാക്രമണത്തിന് വിധേയമായതോടെ ഇവയൊഴികെ ഈ പ്രദേശത്തെ സർവ്വതും തകർന്ന് തരിപ്പണമായിപ്പോയിരുന്നു. എന്നാലിപ്പോൾ ഇസ്രയേലി പട്ടാളക്കാർ രണ്ട് ടെന്റുകൾ ഈ കുടിലുകൾക്ക് സമീപത്തായി സ്ഥാപിച്ചിരിക്കുന്നു. ഒന്ന് പട്ടാള കമാൻഡർമാർക്കുള്ള ടെന്റാണെങ്കിൽ മറ്റേത് സൈനികർക്ക് ഭക്ഷണം കഴിക്കാനും മറ്റുമുള്ള വലിയ ടെന്റാണ്. ഇതു കൂടാതെ പട്ടാളക്കാർക്ക് തങ്ങാനുള്ള മൂന്നു ടെന്റുകൾകൂടി സ്ഥാപിക്കാനുള്ള ഒരുക്കത്തിലാണ് സൈനികർ. കൂടാരങ്ങൾക്ക് കുറ്റിയടിക്കാനായി ചുറ്റിക ഉയർന്നു താഴുന്ന ശബ്ദമാണ് അന്തരീക്ഷത്തിലാകെ നിറഞ്ഞുനിൽക്കുന്നത്.