ബാലിവിലാസം സഞ്ചാരകഥ: അദ്ധ്യായം ഒന്ന്

പൊറ്റെക്കാട്ടിന്റെ പിൻഗാമി

ബാലിയാത്രയെപ്പറ്റി പറഞ്ഞത് വയനാട്ടുകാരനായ ശ്രീ ബാബു കുടക്കച്ചിറയാണ്. അദ്ദേഹവും ഭാര്യ ആലീസും റിട്ടയർചെയ്ത അധ്യാപകദമ്പതികളാണ്. അവരുൾപ്പെട്ട സംഘത്തോടൊപ്പം ഇതിനോടകം രണ്ടു യാത്രകൾ ഞാൻ നടത്തിയിരുന്നു. ആദ്യ​ത്തേത് ഒരു ആഫ്രിക്കൻ (കെനിയ–ടാൻസാനിയ) യാത്രയായിരുന്നു. ‘കോർഡെലിയ’ എന്നു പേരുള്ള ആഡംബരക്കപ്പലിൽ കൊച്ചിയിൽനിന്ന് ചെന്നൈവരെയുള്ള ഉല്ലാസയാത്രയാ​യിരുന്നു രണ്ടാമത്തേത്. പിന്നീട് അവരോടൊപ്പം ഒരു ലക്ഷദ്വീപ് യാത്രയ്ക്കു ക്ഷണിച്ചതാണ്. ആ ദിവസങ്ങളിൽ മകൾ ആമിയും കുടുംബവും അയർലണ്ടിൽനിന്നു വരുന്നതു​കൊണ്ട് ഞാൻ പോകേണ്ടന്നുവെച്ചു.

പിന്നീടാണ് ബാലിയാത്രയുടെ അവസരം വരുന്നത്. അടുത്ത ദിവസംതന്നെ ഞാൻ എസ്.കെ പൊറ്റെക്കാട്ടിന്റെ ‘ബാലിദ്വീപ്’ എന്ന സഞ്ചാരസാഹിത്യകൃതി വാങ്ങി. 1953-ൽ നടത്തിയ ബാലി​യാത്രയെക്കുറിച്ച് എസ്.കെ. പുസ്തകമെഴുതി പ്രസിദ്ധീകരിക്കുന്നത് 1958-ലാണ്. ദക്ഷിണസമുദ്ര ദ്വീപ​സമൂഹങ്ങളിൽ ഒന്നായ ബാലിയെന്ന മരതകദ്വീപിനെക്കുറിച്ച് മലയാളികളിൽ മിക്കപേരും മനസ്സിലാക്കുന്നത് അതിനു​ശേഷമാണ്. 1970 മുതൽ 1973 വരെ പത്താം ക്ലാസ്സിലെ മലയാള പാഠപുസ്തകത്തിൽ ബാലിദ്വീപിലെ ഒരധ്യായം–ഉൾനാട്ടിലെ ഉത്സവം–പഠിക്കാ​നുണ്ടായിരുന്നു. ഞാൻ പത്താം ക്ലാസ്സിലായ വർഷം ആ പുസ്തകം മാറി പുതിയതുവന്നതി​നാൽ എനിക്കതു പഠി​ക്കേണ്ടി വന്നില്ല. എസ്.കെ പൊറ്റെക്കാട്ടിന്റെ മിക്ക സഞ്ചാരകൃതികളും വായിച്ചിരുന്നെങ്കിലും ബാലിദ്വീപ് വായിക്കാൻ എനിക്കു സംഗതിയാ​യതുമില്ല.