പുസ്തകം

പുസ്തകം തൊട്ടപ്പോൾ
ഞാൻ നിന്നെ തൊട്ടു
ഓരോ ഏടിലും നീയുണ്ടായിരുന്നു
ഞാനെന്റെ വിശപ്പു മറന്നു

വായനശാല
എനിക്കു യാനപാത്രം
കേട്ടൂ അക്കരകളിൽനിന്ന്
വസന്തത്തിന്റെ വിളംബരം

ഓരോ ജനനത്തിലും ഉണ്ട്
ഒരു വായനശാല
ഓരോ മരണത്തിലും അത്
സാന്ത്വനത്തിന്റെ കുചേലവഞ്ചി.
വഞ്ചിയിൽ
ദസ്തയേവ്‌സ്‌കി, വാല്മീകി
കാരമസോവ് സഹോദരന്മാർ
ലവകുശന്മാർ.

കിഴക്കുനിന്ന് പടിഞ്ഞാട്ടേയ്ക്ക്
പടിഞ്ഞാറുനിന്ന് കിഴക്കോട്ടേയ്ക്ക്
ഒരു കുരിശുപിളർന്ന്
വെളുത്ത പ്രാവുകൾ പറക്കുന്നു.

ഈ വായനശാല:
തുടങ്ങുന്നൂ ഇവിടെ
എന്റെ ഒന്നാംമൈൽ.
ആ മൈൽക്കുറ്റിയിൽ ചാരിനിന്ന്
എന്റെ സന്ധ്യകൾ
വാനമ്പാടികളായി
എന്റെ നിഴലളന്ന്
ഒരു കൂറ്റൻ മേഘം സഞ്ചരിച്ചു.
ആ മേഘത്തിന്റെ പുറത്തിരുന്ന്
നക്ഷത്രങ്ങളെയ്ത് ഞാൻ കളിച്ചു.

മാനത്തു കളിച്ചാലും
സമ്മാനം കിട്ടാൻ താഴെ വരണം
ഞാൻ കൈനീട്ടിയിറങ്ങിയത്
എന്റെ വായനശാലാമുറ്റത്ത്.

A reflective meditation on the intimate, transformative relationship between the reader and the world of books, where libraries become vessels of imagination, memory, and transcendence across life’s journeys.