കിടക്കയുരുമ്മിക്കിടക്കും മുലപെരുക്കങ്ങൾ.
ചോര ചോർന്നും വാർന്നും
പാവലു വള്ളി പോലെ
മേലേക്ക് പടർന്ന കാലുകൾ.
അപ്പൂപ്പൻ താടികളായി
പറന്നെവിടേക്കോ പോയ
മുടിപ്പൂക്കൾ ......
ചാഞ്ഞും ചരിഞ്ഞും,
അടച്ചും തുറന്നും
'കിങ്ങിണിപ്പത്തായങ്ങൾ'
അവ ഇരുളിലിടയ്ക്കിടെ
വെളിച്ചം ചികയുന്ന
കൂട്ടിരിപ്പിൻ മൂങ്ങക്കണ്ണുകൾ !
ഒച്ചിൻ തോടിലേക്ക്
ഏന്തിയും വലിഞ്ഞുമിരിക്കും
തലയിറക്കങ്ങൾ !
അവയൊരിക്കലും
കൂടെയില്ലാത്ത
നൂൽക്കയങ്ങൾ....
വൈദ്യർക്കു മുന്നിൽ
ചടഞ്ഞിരിക്കും
ഭീമൻ വായ്പ്പിളർപ്പുകൾ.
അപരിചിതമായ
ഇടവഴികളവൾക്കപ്പോളി-
രുണ്ട ഭൂഖണ്ഡം.
'ഒറ്റ'പ്പാച്ചിലുകൾ ....
കോണികൾ തെറ്റി തെറ്റി
ശരിയിലേക്കു വഴി തെളിച്ച
നിഴൽപുണർച്ചകൾ!
കിടക്കവിരികൾക്ക്,
നിലപ്പായകൾക്കു
മീതെയൊരേയാകാശം
ഒരേ തണലു പടർന്ന
യിടങ്ങളിലൊരു കാറ്റ്
ഒറ്റ വീടുകളെ തുടച്ച്
ഒന്നെന്ന് വരയ്ക്കുന്നു.!