അവിടെയെത്തിയപ്പോൾ
ലോകം ഒച്ചയുമനക്കവുമില്ലാതായി
ആളുകളൊച്ചകൾ
ആരവങ്ങളെല്ലാം
പെട്ടെന്നു മാഞ്ഞുപോയൊരു
ലോകത്തിന്റെ നുണകളായി
വന്ന വണ്ടിയുമതിന്നിരമ്പവും
പിന്നിട്ട വഴിയും
അന്ധസൂര്യന്റെ നോട്ടത്തിനു താഴെ
ഇല്ലാതായ ദിക്കുകൾ നിശ്ശബ്ദതയുടെ
നിശ്ചലസൂചികളിൽ കനപ്പെട്ടുനിന്നു
ചെയ്യാനിനിയൊന്നുമില്ലാതായതിൻ
വിടുതിയിൽ ഞാനും തറഞ്ഞുനിന്നു
വിസ്തൃതമായ സ്ഥലപ്പരപ്പ്
നിറയെ നിരന്നുനിന്നൂ മരങ്ങൾ
ഒരിലയുമില്ലാതെ