ഓരോ പുസ്തകത്തിന്റെയും വായനയിലേക്ക് എത്തിപ്പെടുന്നതിന് ഓരോരുത്തർക്കും പല കാരണങ്ങൾ ഉണ്ടാവും. 'പെൺകുട്ടികളുടെ വീട്'' ഇറങ്ങിയ സമയത്ത് പുസ്തകത്തിന്റെ ആമുഖകുറിപ്പ് സോണിയ റഫീക്ക് ഫേസ്ബുക്കിൽ പോസ്റ്റ് ചെയ്തിരുന്നു. അതിലെ അവസാന വരികളാണ് പുസ്തകം വാങ്ങി വായിക്കാൻ എന്നെ പ്രേരിപ്പിച്ചത്. ആ വരികൾ ഇങ്ങനെയാണ്:
"എഴുത്ത് പുരോഗമിക്കവെ വീട്ടിലെ ബുദ്ധപ്രതിമകളുടെ ഭാവമാറ്റം ശ്രദ്ധയിൽപ്പെട്ടു. എല്ലാ ആത്മസംഘർഷങ്ങളിലും ശാന്തിയേകിയിരുന്ന ആ സ്വച്ഛരൂപങ്ങൾ ഒരേ സ്വരത്തിൽ എന്നോട് ചോദിച്ചു : "വീട് എന്നേ ഉപേക്ഷിച്ചവൻ ഞാൻ, വീണ്ടും എന്തിനെന്നെ നീ വീട്ടുതടവിലാക്കി?"
"ലോകം മറ്റൊരു വീടല്ലേ!"-ഞാൻ മറുപടി പറഞ്ഞു. ബുദ്ധൻ എന്റെ കുസൃതിയിൽ ചിരിച്ചു. തുടർന്ന് എന്റെ പെൺകുട്ടികൾ ബുദ്ധനോട്‌ പറഞ്ഞു: "ഞങ്ങൾ വീട്ടിൽ നിന്ന് പുറത്താകാതിരിക്കാൻ ഒരുപാട് കഷ്ടപ്പെട്ടവരാണ്. പ്രിയപ്പെട്ട ബുദ്ധാ, വീട് ഉപേക്ഷിക്കൽ എളുപ്പമാണ്, തിരിച്ചുപിടിക്കലാണ് ദുഷ്കരം."