അകത്തോട്ടു തുറക്കുന്ന ജനാലകൾ

അകത്തോട്ടു തുറക്കുന്ന ജനാലകളുള്ളൊരു
കുഞ്ഞുവീട് വേണമെനിക്ക്
കതകടച്ചകത്തിരിക്കുമ്പോഴും
തെരുവിലെ ആരവങ്ങൾക്ക്
നടുവിലാണെന്ന തോന്നലുണ്ടാവാൻ!

പല നിറമാർന്ന ഫിലോഡെൻഡ്രോണുകൾ
പടർത്തണം ചുവരിൽ മുഴുവൻ
പൂത്തുപന്തലിച്ചു നിൽക്കും മഗ്നോളിയകൾ
നാലു മൂലയിലും നട്ടു വളർത്തണം
പുറത്തു കാത്തുനിൽക്കും
തെക്കൻകാറ്റിനോട് എനിക്ക്
മുഖം കറുത്തു പറയണം:

"ഞാൻ തിരക്കോടു തിരക്കിലാണ്
നിന്നോടു മിണ്ടിപ്പറഞ്ഞിരുന്നാൽ
എന്റെ ചെടികളും കിളികളും തനിച്ചാവും!"

അകത്തോട്ടു തുറക്കുന്ന ജനാലകളുള്ളൊരു
കുഞ്ഞുവീട് വേണമെനിക്ക്.