വായനശാല

വായനശാലയ്ക്ക് പിന്നിലെ
പാഴ്ഷെഡ്ഡിലായിരുന്നു വാസം
ഇരന്നുകിട്ടുന്നതുകൊണ്ട്
കഴിഞ്ഞുപോന്നു

ഒരുനാളൊരു എച്ചിൽപ്പൊതിയിലെ
ഉറുമ്പുകൾ പൊതിഞ്ഞ ദോശ
തട്ടിക്കുടഞ്ഞ് തിന്നാതെന്തിനോ
ഉറുമ്പുകൾക്ക് തന്നെ നൽകി
കിട്ടുന്നതെന്തും പിന്നെപ്പിന്നെ
പങ്കിടുന്നതൊരു പതിവുമായി
ശബരിമലയോ മലയാറ്റൂരോ
ബീമാപ്പള്ളിയോ തെണ്ടിവരുമ്പോൾ
ഉണ്ണിയപ്പമോ പൊരിയോ ഹൽവയോ
പാർട്ടിമീറ്റിങ്ങെങ്കിൽ പരിപ്പുവടയോ
ബിര്യാണിയോ ബിസ്കറ്റോ
ഉറുമ്പുകൾക്ക് സദ്യയാകും