ഒരാൾ സഞ്ചരിക്കുമ്പോൾ
വീടിനെ കൂടെക്കൊണ്ടുപോകാറുണ്ട്
ഇരിക്കുന്നിടത്തും
ഇടപെടുന്നിടത്തും
വീടിനെ കൂടെവയ്ക്കും
അയാൾക്കെത്ര
വാതിലുകളും
ജനലുകളുമുണ്ടെന്നു
വീട് നമുക്ക് കാണിച്ചു തരും
എത്ര സ്ക്വയർ ഫീറ്റ്
വിസ്തൃതിയിൽ
ചിരിക്കാൻ പറ്റുമെന്ന്
അയാൾ നമ്മൾക്കും കാണിച്ചുതരും
വീടിന് അയാളെപ്പോലെ തന്നെ
ആകാരസൗഷ്ഠവവും
അധികാരസ്വരവും ഉണ്ടായിരിക്കും
അയാൾ ഇരിക്കുന്നിടത്തും
ഇടപെടുന്നിടത്തും
വീട് അയാളെപ്പോലെ തന്നെ
ഞെളിഞ്ഞിരിക്കും!
വീടാണോ അയാളാണോ
അയാളെ അധികാരിയാക്കിയത്?!
ഒരാൾ ഇറങ്ങി നടക്കുമ്പോഴൊക്കെ
ഒരു വീട് അയാളെ ചുറ്റിപ്പിടിച്ചു
പിന്തുടരുന്നുണ്ടാകും
വീടിനെ എവിടെയാണ്
ഒളിപ്പിക്കേണ്ടതെന്നറിയാതെ
അയാൾ കുണ്ഠിതപ്പെട്ടുകൊണ്ടേയിരിക്കും
അയാളെത്ര തെളിഞ്ഞവനായാലും
മാന്യന്മാർക്കിടയിൽ ആ 'കറുത്തവീട്'
അയാളെ നഗ്നനാക്കി നിർത്തും
അരഞ്ഞാണച്ചരടുപോലുമില്ലാത്ത
കോളനിവീടുകൾ നിരന്നുനിൽക്കുന്ന ഒരിടത്തേയ്ക്കയാൾ ഓടിപ്പോയി നിൽക്കും
തന്നെക്കാൾ മുന്നേ
വീടിനെ മറയ്ക്കാൻ പാടുപെടുന്ന
ഒരു പറ്റത്തോടൊപ്പം ചരിത്രത്തോളം വിസ്മൃതനാകും
അയാളുടെ വീടിന്റെ അധികാരി സത്യത്തിൽ
അയളാകാത്തതെന്താണ്?!