ചില്ലുകുപ്പി
എറിഞ്ഞ് പൊട്ടിക്കുന്നവർക്ക്
സ്വന്തമായി മുറി വേണം.
അല്ലാത്തവർ
ചില്ല് കോരണം.
വാരുമ്പോൾ വീഴുന്ന ചോര
നക്കിത്തുടയ്ക്കണം.
വേദനിച്ച്, പിടച്ച്
മുള്ളിപ്പോയാൽ
ആ മൂത്രം തുടയ്ക്കാതെ
അവിടെനിന്നും പുറത്തുപോകാൻ
പറ്റാത്തവർക്കൊക്കെ
വേദന ഒരു ലക്ഷ്വറിയാണ്.
ഒട്ടിയ വയറിൽ
നിന്നുമൂർന്നിറങ്ങാതിരിക്കാൻ
പാൻ്റിൽ കയറുകെട്ടിവയ്ക്കണം.
എല്ലുന്തും തോറും
അതാരും കാണാതെ
മുറുക്കാൻ
നമ്മളിൽ ചിലരെങ്കിലും
പഠിക്കണം.