പട്ടി സുഖമായിരിക്കുന്നു

തൊട്ടരികെ തന്നെയുണ്ടവളെങ്കിലും
കാണാനാകില്ല ഒന്ന് പുൽകാനും
ഇന്നലെ വരെ നാടായ ചുമരൊക്ക
ചിരിച്ചു ചെമ്പകമായ് നിന്നവൾ
തൊഴിലിടത്തിലും വീടകത്തിലും
കര കവിഞ്ഞു തുളുമ്പിയവൾ
തൊട്ടാൽ പൊള്ളുന്ന കവിതയും
സൂര്യമുഖം കോട്ടിക്കും പ്രസരിപ്പും
കാക്കയെ വെല്ലും സാന്നിദ്ധ്യവും
തിരയേ കവയ്ക്കുന്ന വാശിയും
കാറ്റിനെ വെല്ലും പകർന്നാട്ടവുമായി
സർവ്വതിലും വ്യാപിയായിരുന്നവൾ.

ഇന്നലെ രാവിലവളെയൊരു പട്ടി കടിച്ചു
മുറിവായിൽ പരന്നത് ചോരയായിരുന്നില്ല
പറ്റി നടന്നവരുടെ ചെലമായിരുന്നു
കപട വായകളുടെ ദുർഗന്ധമായിരുന്നു
ഇരുട്ടിയുണരവേ അവളുടെ മുഖമില്ല
പേരില്ല നാടില്ല കൂടില്ല വീടില്ല ഇനി
അവളാണ് പോലും അതിജീവിത
വേവലാതിയേ വേണ്ട മഹാ മൗനങ്ങളേ
പട്ടിയിപ്പോഴും ഏറ്റം സുഖമായിരിക്കുന്നു

Malayalam poem patti written by Hashim Bappan