വിളക്ക് ഏട്രി വെയ്ത്താൽ കൂട
നിഴൽ പോല തോന്ട്റും നിജമെ
നിഴൽ പോല തോന്ട്റും നിജമെ
(അഗ്നിസാക്ഷി - വാലി, എം എസ് വി)
നനവുമാഞ്ഞൊരു തമിഴ് വേനൽ വാരിച്ചുറ്റി
വിയർത്തും മെലിവാർന്നുടൽ തളർന്നും
നിസ്സഹായം മയങ്ങുന്നു കൂപ്പുകൈപോൽ
മഹാവിഷാദകാല സഹനം - പൂങ്കുഴലി.
പനൈ മരങ്ങളിൽ കോവിൽ കൊടികളിൽ
ചോളവയൽകളിൽ മല്ലിഗൈ മണങ്ങളിൽ
പകുത്തു ക്ഷീണിച്ചലഞ്ഞ കാറ്റുവന്നെത്തി
കൺമൂടി നിന്നൊരാ മുടിയിഴകൾ മാറ്റുന്നു.
കൺ തുറക്കുന്നു, ചുറ്റും അകംചുമരിനാൽ
ജീവപര്യന്തം ചാർത്തി അവളേറിയ വീട്,
ഉയരമില്ലാത്ത വാതിൽ, വെയിൽ വരയ്ക്കും
വെളിച്ചത്തിൻ കിണർവെള്ളമെത്തും ജനൽ.