ഒരിക്കലീമലയിൽ
അവളും ഞാനും കൂടി
സ്‌കൂളീന്ന് ടൂറ് വന്നിട്ടുണ്ട്
ബാക്കിയെല്ലാരിൽ നിന്നും
തെന്നിമാറി തോളത്തു കൈയ്യിട്ട് നടന്ന്
ദാണ്ടക്കാണും പാറേടങ്ങേപ്പുറത്ത്
ചാരി നിന്നുമ്മവെച്ചിട്ടുണ്ട്
പെട്ടെന്ന് പെയ്‌തൊരു മഴ മുഴുവൻ
ദോ ലവിടെനിന്ന ഒരേഴിലംപാലച്ചോട്ടിൽ
കെട്ടിപ്പിടിച്ചു നിന്ന് നനഞ്ഞിട്ടുണ്ട്
എങ്ങൂന്നോ അവളുടെ
ബാഗിലന്ന് മറന്ന് കിടന്ന
ഉണങ്ങിത്തുടങ്ങിയൊരു ചെമ്പരത്തിക്കമ്പ്
ആ പാറയുടെ ആ മറവുപുറത്ത്
ചാറ്റമഴയിൽ കുത്തിയിരുന്ന്
ഒന്നിച്ചൊരു കുഴിയെടുത്ത്
ആദ്യ ഉമ്മയുടെ ഓർമ്മക്കെന്ന്
പറഞ്ഞു ചിരിച്ച്
ചുമ്മാ നട്ടുവെച്ചിട്ട് തിരിച്ചു പോയി