ആരാണ് ജയിച്ചത്

യുദ്ധത്തിൽ ആരാണ് ജയിച്ചത് 
മരിച്ചവരോ ജീവിച്ചിരിക്കുന്നവരോ
പിന്നിലെ നിലവിളിയിൽ വേദനിച്ചോ
മുന്നിലെയലർച്ചയിൽ ആനന്ദിച്ചോ
ശവം തീനികളായ കഴുകന്മാർ
തീയടങ്ങാൻ കാത്തിരിക്കുമ്പോൾ
ആകശത്തു വട്ടമിട്ടു തീതുപ്പുന്ന 
പുതുയുഗത്തിലെ ചാരക്കണ്ണുകൾ
തകർന്നടിഞ്ഞ മൺകൂനയിലാകെ 
നെഞ്ചരികിൽ നഷ്ട്ടപ്പെട്ടമ്മയുടെ
അഭയംതിരയുന്ന കുഞ്ഞിക്കണ്ണുകൾ
ചിതറിത്തെറിച്ച മനുഷ്യരൊക്കെയും
തിരികെവരാത്തവണ്ണം ഭയപ്പെട്ടിരിക്കുന്നു
ഒടുങ്ങിപ്പോയവരുടെ ഓർമ്മകളിലല്ല 
മടങ്ങാനിടമില്ലാത്ത നിസ്സഹായതയിലാണ്
ഓരോ മനുഷ്യരുo തകർന്നടിഞ്ഞത്.

യുദ്ധം മനുഷ്യരുടെ നിലവിളിയാണ് 
നാശത്തിന്റെ കണക്കെടുപ്പുകളിൽ
മനുഷ്യർ മാത്രമല്ല മരിക്കുന്നത് 
പ്രകൃതിയും ചരിത്രവും ചലനവുമാണ്