ജീവിതങ്ങൾ മരണങ്ങൾ

Book Review

ജീവിതങ്ങൾ മരണങ്ങൾ


കഥകളായി അടുക്കിപ്പെറുക്കുന്നതോ കഥകളിൽനിന്ന് പെറുക്കിയടുക്കുന്നതോ ആയ അനുഭവങ്ങളുടെ ആകത്തുകയാണ് ജീവി​തമെന്ന് അടിവരയിട്ടു പറയുന്ന, ഓർമ്മകളുടെ കാവ്യകേളിയാണ് ‘വാക്കുകൾ പാർക്കുന്ന ദേശങ്ങൾ’. ജീവിതംപോലെ ഒരേസമയം തന്നെ വ്യർത്ഥവും വ്യാമുഗ്ദ്ധവുമായ മറ്റൊന്നുണ്ടെങ്കിൽ അത് മരണമാണെന്നും ഈ മഹാ​കാവ്യം നമ്മോട് പറയുന്നു. എന്നാലോ? ജീവിതത്തെക്കുറിച്ചും മരണത്തെക്കുറിച്ചും മാത്രമുള്ള കഥനങ്ങളുമല്ല ഈ പുസ്തകം. ജീവിതത്തിലെ മരണങ്ങളെക്കുറിച്ചും മരണാ​നന്തര ജീവിതങ്ങളെക്കുറിച്ചുമുള്ള ഓർമ്മപ്പുസ്തകംകൂടി​യാണ്.

എന്തുകൊണ്ടാണ് ചില ജീവിതങ്ങളും ചില മരണങ്ങളും ഭാവന​യെക്കാൾ വന്യവും വിചിത്രവും ദീപ്തവും ഭീതിദവുമായി നമ്മെ ആകർഷിക്കുന്നത്? ഏതുതരം മനുഷ്യരാണ് നൂറ്റാണ്ടുകൾ കഴി​ഞ്ഞാലും മറ്റു മനുഷ്യരുടെ പ്രജ്ഞയിൽ തീയും ഗന്ധകവും കോരി​യിട്ടുകൊണ്ടേയിരിക്കുന്നത്? എത്തരം ഓർമ്മകളാണ് സ്ഥല കാലങ്ങളെയും ചരിത്രബോധങ്ങളെയും സ്തംഭിപ്പിച്ചും ചലിപ്പിച്ചും ഭാവലോകങ്ങളെ മൂർത്തമായി വിഭാവനം ചെയ്യുന്നത്? ‘വാക്കുകൾ പാർക്കുന്ന ദേശങ്ങൾ’ വായിക്കൂ. അനന്തവൈവിധ്യമുള്ള ലോക​ക്കാഴ്ചകളെ, സൂക്ഷ്മസുന്ദരമായ പ്രാണബന്ധങ്ങളെ, രക്തഗന്ധ​മുള്ള ചരിത്രസന്ധികളെ, കാമനാഭരിതമായ ജീവിതാവേഗ​ങ്ങളെ, അവിശ്വസനീയമായ അനുഭവഭൂമികകളെ, അതുല്യമായ പ്രതിഭാവിലാസങ്ങളെ, അനു​പമമായ ലാവണ്യകേളികളെ, ആഘാതശേഷിയുള്ള വാഗ്‌ധോരണി​കളെ, അസ്ഥി മരവിപ്പിക്കുന്ന ആത്മ​നാശങ്ങളെ, കൊടിപ്പടം താണ വിജയവൈജയന്തികളെ... ജോജോ ആന്റണി തന്റെ വായ​ന​യു​ടെയും സ്മൃതിയുടെയും ഭാവഭൂപടത്തിൽ പുനരാവിഷ്‌കരി​ക്കു​ന്നത് കാണാം.

മനോരമ ഓൺലൈനിൽ ജോജോ എഴുതിയ വരാന്ത എന്നപംക്തിയുടെ പുസ്തകരൂപമാണിത്. ആറോ ഏഴോ രചനകളൊഴികെ ഈ സമാ​ഹാരത്തിലെ മിക്ക കുറിപ്പുകളുടെയും അച്ചുതണ്ട് സാഹിത്യമാണ്. പ്രധാനമായും കഥാസാഹിത്യം. ആധുനികതയുടെ ജീവചരിത്രമായി മാറിയ ഫിക്ഷന്റെ, നൂറ്റാണ്ടുകളുടെ വൈപുല്യവും ഭൂഖണ്ഡങ്ങളുടെ വൈവിധ്യവുമുള്ള ഏടുകളിൽനിന്ന് ജോജോ കണ്ടെടുക്കുന്ന അത്യസാധാരണമായ മർത്യാനുഭവങ്ങളുടെ ഭാവഗീതങ്ങളാകുന്നു ഈ പുസ്തകത്തിലെ ഓരോ കുറിപ്പും. കഥകളെക്കാൾ അവിശ്വ​സനീയവും മരണത്തെക്കാൾ അസഹനീയവും സ്വപ്നങ്ങളെക്കാൾ അമ്പരപ്പിക്കുന്നതുമായ ഒന്നുണ്ടെങ്കിൽ അത് ജീവിതമാണെന്ന് പേർത്തും പേർത്തും തെളിയിക്കുന്ന രചനകൾ.


Related Articles